Nga Jelcini tek Putini, elemente të tranzicionit komunist në Rusi dhe një paralelizëm i shkurtër me Shqipërinë
Nga pikëpamja teorike, tranzicioni është quajtur procesi historik gjatë të cilit shoqëritë ish-komuniste kryejnë transformimet radikale të regjimit politik dhe ekonomik socialist në atë të demokracisë pluraliste dhe të ekonomisë së tregut. Pra në aspektin ekonomik, përgjatë periudhës së tranzicionit, sistemi ekonomik s’është më socialist por ende nuk është as tërësisht kapitalist. Kur themi tranzicion, ajo që mund të diskutohet është kohëzgjatja, pra sa rrugë kemi bërë, sa na ka mbetur për të bërë, a po ecim shpejt apo kemi ngecur në shkretëtirë, është i vështirë apo i lehtë. Në fillim të viteve ’90 termin tranzicion e kemi konsideruar si mjaft të gjetur për të shprehur rrugën që do të bënin vendet ish komuniste për të kaluar nga sistemi diktatorial në atë demokratik, nga ekonomia e komanduar në tregun e lirë, nga monopartitizmi në pluripartitizëm, nga uniteti i popullit rreth partisë së vetme në ndërtimin e shoqërisë civile si kundërpeshë e pushtetit. Vende si Polonia, Hungaria, Çekia apo edhe Sllovenia nga shumë studiues konsiderohen si “vende në post – tranzicion”. Në vende të tjera si psh Rusia apo edhe vetë Shqipëria, situata paraqitet pak më e ndërlikuar.